Isch wääß jo nimmi, wann, wie un warum isch emol gheert hab, daß die Mennonidde in de Geschend von Pittsburgh Pälzisch redden. Des nennse awwer "Pennsylvania Dutch". Wie des kummt?
Die Mennonidde sin e Religionsgemeinschaft, wo zurickgeht uff en Menno Simons aus Friesland. Noochem Augsburscher Religionsfriede henn se wedder bei de Kadoligge noch bei de Brodeschdante so rischdich noigebaßt - awwer do waa jo noch de Kurferschd vun de Palz, un der waa bekannt fer soi religieesi Toleranz. Dort henn sisch dann die ganze Religionsflischtling gsammelt un nadierlisch ach die Schbrooch gelernt. Pälzisch halt.
Wie awwer dann im ganze Reisch die Wehrpflischt oigfiehrt worre is, sinn die Mennonidde ausgewannert, en ganze Haufe devuu hot sisch in de Neh vun Pittsburgh/Pennsylvania aagsiedelt. Die lääwen heit noch wie vor zwäähunnert Johr, un ehr Schbrooch hennse sisch ach erhalde.

Alla, des hawwisch gewißt, wie isch vor viele Johre mit moim doomols Frischaagtraude uff Haiti war. Im Hotel dort hemmer en Ami kennegelernt wo verzeehlt hot, dasser Missionar is. Wie isch dann noch gheert hab, dasser Mennonit is, hawwisch nadierlisch glei die Broob uffs Exembel mache misse! Hawwen also erscht emol gfroocht, ob er Deitsch kann.
"No, I don\'t speak German". Dodemit waren schun emol Verwechslunge ausgschlosse.
Isch hab weider gfroocht:
"Do you speak Pennsylvania Dutch?"
Do waarer fascht beleidischt, daß mer so ebbes iwwerhaupt frooche kann:
"Of course I speak Pennsylvania Dutch! I am a Mennonite, and all Mennonites speak Pennsylvania Dutch!"
Dann hawwisch Pälzisch middem weidergebabbelt. Der waa ganz schää baff un hott sisch - uff Pälzisch! - gewunnert, daß jemand aus Euroba Pennsylvania Dutch kann. Moim Frischaagetraude is sowieso de Unnerkiefer runnergfalle, der hot erscht rescht net kabiert, wieso isch misch middeme Ami, wo kää Deitsch kann, uff Pälzisch unnerhalt.
Isch hab mer nadierlisch ääns gegrinst, hab misch gfräät wie en Schneekäänisch, daß der Realidädstescht so gut funktioniert hot un hab die zwää emol uffgeklärt.
Soll jo nimmand dumm schderwe, gell?
Un Pälzisch babble is net es Allerdimmscht wo mer mache kann!